11

هيه يا سعديه وينك
هيني بالمطبخ يابا
وين امك
راحت عند الجاره اصلها حكت معها ع المسنجر ولقتها عيانه راحت تشق (( تطمن )) عليها
طيب انا الليله رايح لعند ابو سليم بنته خطبت والليله الجاهه (( جمعه رجال البلد ))
قولي لامك تكوي الي مش تنسى حاكم هالأيام بتنسى كتير صايره
ماشي يابا هلا انا بكوي الك مايهمك
طيب رايح اغفى الي شوي وماتنسي تصحيني الساعه 6
نوم العواف يابا

هو علي رايح معك ؟
لأ مش رايح
طيب

ههيني خلصت شغلي وماعلي اشي اشوف صاحباتي شو اخبارهم

مساء الخير نسيمه كيفك الحمد لله سعديه بخير وانتي ؟
الحمد لله
شو عملتي اليوم ؟
والله رحت وخلصت كل الاوراق المطلوبه للشغل والله كريم
الله كريم مهيني انا التانيه مستنيه فرج الله
مين بتشوفي من الشله
ماحدا غير سمير مبارح شفته
وشو اخباره
منيح هيو مستني الشغل هو كمان وقاعد فاضي بيتنطط من منتدى لمنتدى ع هالنت وبيدق (( بيخانق )) بهذا شوي وبيغازل هاي شوي ويدلع هاي شوي
اها مهو الفاضي بيعمل قاضي وبيتسلى عالعالم
والله قله هالشغل مخليه هالشباب بتتخبط ومش عارفه شو تعمل بحالها
الله بعين ياختي بكره بيلاقي شغل وببطل هالقعده كلها
ماشي انا بدي اروح اكمل بحث مبارح بديته بشوفك بعدين
اوكي الله معك
سلمي
الله يسلمك

10

((10))




صباح الخير سعديه
هلا يما صباحك هنا
كيف اصبحتي
الحمد لله تمام بس شوي صدري مطربق علي ومو قادره اتحرك
آآآآآآآه طبعا منتي مابتقصري ولا بترحمي حالك اول ماتقعدي ع النت هات يا دخان
اه والله معك حق ياسعديه الواحد مش عارف شو بيصير معه اول مايقعد عهالجهاز
كل حياته بتنقلب قلب
طيب روحي ارتاحي هلا بعمل الك كاسه بابونج بلكي بترتاحي الك شوي
طيب حبيبتي يسلمو ايديكي
وينك سعديه حبيبتي اعملي الغداء ابوكي عازم ابن عمه اليوم لعنا
وانا زي منتي شايفه ماني قادره
ماشي يما ولايهمك راح اعمل كل اشي بس ارتاحي انتي
هيه يا علي
يا علي
علي
ياعلللللللللللي
آآآآآآآآآه شو بدك
حتى انت ياعلي غطست وبطل حد عارف يحكي معك
قوم روح جيب الي زهره (( قرنبيط )) وجزر ابوك عازم ناس ع الغداء اليوم وبدي اعمل مقلوبه
طيب استني بس اخلص القيم
اشو تخلص القيم يادوب الحق انا
ياستي قلنا طيب ثواني شو هو الضيف قاعد مستني عالباب
لا مو مستني بس خلصني بدي اخلص عندي شغل كتير وامك عيانه اليوم
اتفضلي يما هي كاسه البابونج الف صحه وهنا على قلبك وانا رايحه اشوف المطبخ
وينو علي
هيو بيلعب وبس يخلص بدو يروح يجيب الاغراض
طيب حبيبتي يسلمو ايديكي عزبتك معي انا
لأ ماتحكي هيك سلامتك يما
هيني خلصت ترتيب البيت وركبت الجاج عالنار
على مايجي علي خليني اشوف اميلي واتفقده
ييييييي مين هون
هنيه
هلا هنيه كيفك
الحمد لله انتي كيفك سعديه
انا الحمد لله
شو عملتي بالجامعه اليوم
كان والله يوم طويل وشاق
ليش خير شو صار معك؟
ياستي هدول جننوني
خلصنا هالجامعه وبدنا ورقه التخرج
وروح لفلان وروح لعلان ولا وشو النهفه
الست اللي كانت مسؤله عن اوراق العمل التطوعي نقلت وجابو غيرها مش عارف اشي
وقال شو اوراقي ضايعه ومطلوب مني اعيد العمل التطوعي 60 ساعه كمان مره
الله واكبر وشو عملتي
ولا اشي هيني بطارد هون وهون والله ييسرها من عندو
ماشي حبيتي اجا علي وبدي اوقوم اكمل شغلي
اوكي سلمي عالكل
الله معك

9

((9))


ياااااااااابا
شو ياعلي خير مالك
شفت الناطور (( الحارس )) اليوم وبيقلي شو مال ابوك ان شاء الله صحته تمام
قلت اله الحمد لله لشو بتسأل
قال لأ بس هو مو عادته يهمل الحقلة وكان ماشاء الله عنه نشيط ومن الفجر بيكون شغال
اها طيب يااااااااابا
هيه ام علي
اه يابو علي هيني بالمطبخ
انا بدي اروح شغلي بدك اشي
لأ سلامتك بس قولي شو بدك تتغدى اليوم
اعملي شو مابدك
اللي منك بركه وعسل
والله شو هالرضى خيو مش متعودين منك هالحكي الحلو
ييييييييييي علينا لا هيك عاجب ولاهيك عاجب
احترنا يااقرع من وين نمشطك
يالله سلام
طيب الحمد الله اجى الفرج اقعد انا اشوف شو جد بهالدنيا

اهلا وسهلا بك مرة اخرى ياقمر

وشو هذا اللي طلع الي كمان لنشوف
اها رساله خاصه
مرحبا ياام علي كيفك
ممكن نتعرف
واعطيكي اميلي وندردش سوى

ومين هذا كمان
يالله بنضيفه شو ورانا بنتعرف كل الناس خير وبركه


اي اشو هذا ياااااااه
مشتهيه بس افتح الاقي اشي عليه القيمه بالصفحه الرئيسية
الا كله العاب العاب
اشي ارمي البطيخ شو الناس غاويه تتحمم كل شوي
والا شو الرقم 15 بيكون القمر
اي هو في قمر غيري انا
يالله عالم زهقانه وبتتسلى

8

(( 8 ))

هيه يابو علي
وينك
هيني هون شو بدك
ولااشي اصلي مش سامعتلك حس قلت اشوف وينك واطمن عليك
اطمني انا هيني عالكمبيوتر قاعد بتفرج
وعجبك اشي ؟
هيني بتفرج وبقلب بقرأ الاخبار وبشوف الدنيا شو صاير فيها
والله الدنيا خربانه واحنا مش حاسين يام علي
ولك شو هذا اللي عم بيصير حوالينا
غزه ماكله هواء
اه والله بقعد بشوف اشي بقشعر البدن يا زلمه
الله ينتقم منهم الهي

ربك كريم الا مايجي الهم يوم
دوام الحال من المحال ولو دامت لغيرك ماوصلت الك
طيب انا بدي اروح اكمل شغلي
ماشي هيني هون لو بدك اشي
شو هذا اللي بيضل يضوي ويطفي
هات لنشوف ونتفرج
شات وشو هو هالشات هذا كمان
هات تنفوت

نكتب اسم نكتب اسم
شو نكتب شو نكتب
نقول فارس زمانه
اها اسم حلو وفيه قوه ورجوليه
ياعيني عليك يابو علي شو انك حليوه وقمور
السلام عليكم شباب
هلا والله بالفارس كيفك
الحمد لله انتم كيفكم
تمام والله
من وين الفارس بلا صغره
هلا فارس كيفك
انا همسات من الاردن
حضرتك من وين ؟
انا من فلسطين ياحلوه كيفك
الحمد لله فل
بدي اقلك اشي
شو رايك اعطيك اميلي وندردش سوى هناك
وليش لا بيصير بس صبرك لخلي علي يعملي اميل
هاتي اميلك عشان نحكي
ماشي انا بالانتظار

7

((7))
شو هذا كيف لو اني مش قايلك وموصيكي قبل ماانام
وين الاواعي ياست
يييييييييه والله نسيت
ولك شو جرى الك ماكنت بطلب منك زمان ودايما بلاقي اواعيي جاهزين
صايره ولا يهمك اشي وبتطبخي من غير نفس ولا بتهتمي باي شي بهالبيت
والله انا عامل زي اللي بيجيب الدب لكرمه (( حقله ))
كنت مرتاح ومتهني شو عمى على قلبي ودخلت هالمخسوف
بس يالله اللي من ايدو الله يزيدو
ييييي علينا مش راح نخلص اليوم
حقك علي هلا بقوم بكوي
شو جرى نسيت مره خربت الدنيا يعني ولاشو
طيب قومي خلصيني بسرعه يادوب الحق
لما اشوف شو هذا اللي ماخد عقلها هذا ومنسيها نفسها وبيتها
هات تا العب الي دور شدة (( كوتشينه )) على ما تخلص كوي
هيه يابو علي
ابو علي
ابو علي
شووووووووو
وينك
هيني شو خلصتي
اه شو وينك مابترد
ولااشي كنت بلعب
اها طيب خود اواعيك
والله حلوه هاللعبه ماحسيت كيف الوقت مرق
بس اجي من الاجتماع بدي تعلميني كيف بتستعملي هالجهاز وكيف بتدخلي على مواقع
يا حبيبي عشان تقعد وانا اقعد استنى فيك وشو يعني هو انا جبته الك لحالك ليكون
لا يعمي مو لالي لحالي روح اتوكل على الله ولترجع فرج
طيب سلام
ـــــــــــ
هيه يا سعديه
اه يما شو بدك
تعي شوفي شو بيقول هذا
شو يما مالك
ولا اشي زهقت من المنتدى اللي انا فيه وسجلت بغيرو
بيقولي لازم افعله من الايميل
اه يما بتفتحي اميلك بيكون وصلك وصله وهيك بتتقدري تشاركي
وشو هالايميل من يوم ما علي عملوا ما فتحته
طيب يما هلا بفتحه وبعملك المطلوب
وشو هالصفحه اللي فتحتيها هاي
هاي مسنجر
وشو هالمسنجر كمان
هذا الناس بتحكي مع بعض فيه وبتتعرف
اها ومن وين الناس بتيجي هون
هذا بتعطيهم اميلك بيضفوكي وبتحكي معهم وبتتعرفي
اها طيب ماشي
خلصت يما اتفضلي
هلا بضيف الك اميل جارتنا لتحكي معها
ماشي يسلمو ايديكي حبيبتي

6

((6))



هيه يام علي تعي جبت الك عكوب (( اكله فلسطينيه بس بيلزمها شغل جامد )
عكوب وانو اللي طلب منك تجيب عكوب
شو من امتى مابدك عكوب عحساب بتحبيه كثير
اه بس بدو شغل كتير وبياخد وقت طويل
وشو يعني منا طول عمري بجيبه وعمرك ماقلتي لأ
طيب طيب حطه بالمطبخ
منت مبارح لسا جايب لي كوسا وورق دوالي (( ورق عنب )) والتاني بدو شغل
هو انا بدي اقضي عمري بالمطبخ والا شو
ياستي طول عمرك بتطلبي هالاشياء شو عدى مابدى (( شو غير الحال ))
لا عدى ولابدى بس تعبت من وقفه المطبخ ليل نهار اي ارحم يا زلمه
والا كيف ترحم وانت كل همك عبطنك
الله يسامحك ياام علي
مني كمان طول النهار بهالحقله بزرع وبقلع والعظمه كبرت يعني ماحملتك جميله
والا صرتي بس بدك شغل سريع عشان تلحقي تقعدي عالمخسوف النت هذا اللي اكل عقلك
اه صحيح انت عارف مبارح كان في موضوع حامي والناس دخلت وشدت مع بعض وهات حلها
ولا شو طول الوقت بيقولوا لبعض يااخوي ويا حبيبي ومدرك اشو وابصر اشو
عاملين فيها حبايب وأول مادق الكوز بالجرن اتدبحوا وبانو على حقيقتهم
طيب طيب
وانا شو خصني فيهم مايتدبحوا والا يحرقوا والله انك غاويه نقار

انا عندي شغل الليله فيه اجتماع عند المختار بدي انام
واكوي الي اواعي (( ملابس )) مرتبه مش تنسي

لا مش راح انسى اطمن
منت يابدك توكل يا بدك تنام يا بدك تطلع ماجد علينا اشي
طول عمره هالحال ماتغير ولا جد عليك اشي

5

(( 5))



يما حبيبتي تعي ستي بدها اياكي

طيب يا سعدية صبرك علي شوي
طيب بس ماتطولي
لا لا دقيقه جايه

يمااااااااااااااااا
شو يما
وينك يما الي ساعه بقولك بدي اياكي
يي علينا مقلت دقيقه
ما الك ساعه بتقولي دقيقه هيه الدقيقه عندك مابتمشي والا شو يما
اللهم طولك ياروح
بنخلص من نق ابوكي بيطلع اخوكي بنخلص من الاتنين بتطلعيلي انتي
خير شو بدك انا مش فاضيه الك
وشو اللي شاغلك هالقد وماخد عقلك يما ومش مخليكي فاضيه لحدا
بقرأ وبشارك شو بعمل يعني
الله واكبر هو فش اشي صار بحياتك غير هالنت
خلصينا شو بدك بالمختصر المفيد
يا ستي هاي ستي كانت معي عالخط وسالت عنك وينك مابتشوفك ناديتك لتحكي معها مارديتي
طيب مكنتي قلتي انها امي ماابردك
يما حكيت الك بس انتي مو منتبه لحدا ولا بتسمعي حدا
بتحطي راسك بهالجهاز وبتنسي الدنيا باللي فيها

4

((4))



هيه ياعلي
تعال شوف شو اللي بيطلعي هذا
شو يما شو مالك صبحتي تحلمي عالنت خير شو بدك
مابعرف شوف شو بيطلع كل ما اجرب ارد
وع شو بتردي ان شاء الله
هون موضوع عجبني ومكتوب اضافه رد وكل مابدي اضيف رد بيطلع هذا

أنت لم تسجل الدخول بعد أو أنك لا تملك صلاحية لدخول لهذه الصفحة. هذا قد يكون عائداً لأحد هذه الأسباب:
أن غير مسجل للدخول. إملاء الاستمارة أدنى هذه الصفحة وحاول مرة أخرى.
قد لا يكون لديك إمتيازات كافية لدخول هذه الصفحة. هل تحاول تعديل مشاركة شخص آخر,دخول ميزات إدارية أو نظام متميز آخر؟
إذا كنت تحاول كتابة مشاركة, ربما قامت الإدارة بحظر حسابك , أو أن حسابك لم يتم تفعيله بعد.

يما يا حبيبتي
هذا منتدى وعشان تردي لازم تسجلي وعشان تسجلي لازم يكون عندك ايميل
طيب بلا ماتتفلسف على واقعد اعمل اللي بتحكي عليه وخلصني
طيب حاضر بتؤمري امر يما
اتفضلي يا ستي هي ايميلك جاهز وهيني بدي اسجلك . شو بدك تسمي حالك ؟
مممممممممممممممممم بدنا اسم حلو
زي شو يعني

نقول ........ قمر
ياسلام قمر
شو ناقصك دلع من ابوي يما والا شو ؟
ليش يا حبيبي وشو خص ابوك بالموضوع
اه مهو عشان اي حد بدو يرد عليكي راح يقلك يسلمو ايديكي ياقمر
يشيخ روح والله انك فايق ورايق

3

((3))



شو هذا ياام علي

شو ماطبختي اليوم

لا اصل الموضوع شدني كثير ومالحقت اطبخ

ياسلام والله وهلت بوادرك يا نت وبدل الطبيخ بقينا ناكل نواشف والله يستر من اخرتها

اي شو هذا انت كل اشي عندك اكل وبس

يعمي في اشي اسمه حقوق المرأه سمعت عنه هذا والا اكيد لا شو بيهمك

بترجع البيت تلاقي اكلك وشربك ولبسك وكله حاضر وياريت حتى بتقول يسلمو

الا لو في اشي بتنق وبتنكد ولو حلو بتسكت مابنسمع صوتك

وشو هذا كمان

من وين طلعتي النا بهالحقوق اللهم صلي على النبي اول ماشطح نطح اسم الله حولك وحواليكي

هاتي لشوف شو حقوقك ياستي اللي مش ماخدتيها

طيب بس ماتعصب في اشي اسمه اخد وعطى وهاي اول حقوقي

انك تسمعني وتحس فيي وتساندني وتحسسني اني انسانه مو جاريه اشتريتها لخدمتك انت وولادك

اوف اوف اوف

هذا مولعه معك وانا مش داري

لا مولعه ولا اشي انت سالت وانا برد عليك

طيب طيب انا تعبان من الفلاحه طول النهار ومش رايق الك

امري على الله خليني اكل بدي اناااااااااااااااااااام

2

((2))



هيه يام علي وينك

انا هون ابن عمي

شو بتعملي

بقرأ موضوع

ياسلام وسايباني لحالي

اصله شدني كثير

اليوم تعبت من الشغل وابنك علي ماساعدني ضل يماطل

طيب

هذا الي قدرك عليه الله طيب

شو بدك اعمل يعني بقلك موضوع شدني تقولي تعبت اليوم

اها يعني موضوعك اهم مني

لا بس

طيب قومي حطي النا اكل بلا حكي فاضي

حكي فاضي طبعا همك عبطنك دايما

اما صحيح جاهل

اها بلشنا

بطلنا عاجبينك يا ست

انا الحق علي

طيب اقله اسال عن الموضوع شو هو مو كله اكل اكل فيه اشي اسمه ثقافه بتعرفه ؟

لا ياستي منك نستفيد

طيب خلص خليني احط الك اكل احسن من وجع القلب هذا

طيب الحمد لله حنيتي علينا

وتسلم ايديكي

يوميات بو علي / حلقات مسلسه / من تاليف / منى

((1))



ـ بو علي شو خيو مابدك تجيب النا النت زي كل اهل البلد

ـ صبرك علي ام علي شوي بس وبجيبه عشو مستعجله يختي

ـ مش مستعجله بس بزهق وانت طول النهار بره

ـ طيب روحي عند صاحباتك بتتسلي معهم عند الجيران

ـ مهما كلهم دخلوا النت وكل مااروح عند واحده بحسها بس بدها تخلص مني

ـ ياستي طيب والله لاجيبه بس منتي عارفه شغلي كتير ومامعي وقت لهالشغلات

ـ طيب بسيطه علي بركبه بس انت قول طيب

ـ طيب ياستي اذا بريحك امري على الله

ـ هيه يا علي

ابوك وافق يدخل النا النت يالله بدنا نتسلى

ـ ماشي يما بس انتي بتعرفي تستعمليه

ـ وهو شغله يعني سهل بنتعلم زي مالعالم كلهم اتعلموه هما كانو بيعرفو قبل مايجيبوه

واللي بحط براسه شغله بيقدر يعملها

ـ ماشي ولايهمك بكره ان شاء الله بيكون راكب عندك

ـــــــــــــ

ـ ياعيني شو حلو النت بيسلي بفوت على مواقع بقرأ وبتفرج عالناس شو بتكتب

وفيه صور حلوه كتير وناس كتير مجتمعين تحسهم عيله بصحيح